最掂燒味 (已結業)

夜晚同同事打完波，行番屋企時，比呢間餐廳既名吸引咗，叫 最掂叉燒。把心一橫，就試下佢啦。由於入座時已經九點三，入面已經冇哂客人。而且店員仲同我講已經冇哂叉燒，建議我食燒腩仔油雞飯，配熱飲盛惠55蚊。落咗單，五分鐘左右已經上菜。望落去，燒腩既肥膏比例唔錯。而油雞就比咗副多骨既翼部比我。配菜有三條幾鮮既油菜。而食落去既燒腩仔，外皮燒得幾脆。大啖肉加肥膏配上芥辣，真係幾多碗飯都唔夠。而油雞質素就一般，外皮既汁唔太入味，雞肉唔多。整體上都算係一碟唔錯既燒味飯，份量唔細。而店員服務有禮貌，唔會因為你係最後一個客就黑面趕你食快啲埋單。