好湯好麵 (名店坊)

營業中

休息中

從來無諗過會食一碗百幾蚊上海麵，日式拉麵都唔使一百蚊啦。但在朋友極力推薦下，我都試下豪食中式麵。涼拌麻辣茄子，半條茄子蒸完雪到好凍，淋個醬汁唔辣都唔麻，個味道好似係李錦記黑椒汁。唔推薦。海龍皇同蠔皇豬豬，整體都算靚湯靚料，海龍皇入面有兩隻大蝦，雖然要自己剝殼，但好新鮮D蝦肉都好彈牙；反而蠔皇豬豬入面幾隻鳳尾蝦，唔使自己剝殼，但係食得出係雪蝦。廣島蠔同帶子都夠大，都好新鮮。我個人認為扁麵煮既時間太短，偏硬身，口感差，下次再食可以要求個麵煮耐D軟D。我諗D湯都應該無味精，因為飲完湯都唔會覺得頸渴要飲好多茶/水。新店裝修都幾好，洗手間乾淨。但D檯凳好趕客，坐得唔舒服，檯同檯之間好逼，客人好自然食完立即要走，唔會想傾下計坐多陣。唔可以算抵食，只能話一分錢 一分貨，但相比起百幾蚊碗台灣牛肉麵，呢碗合理D。