黑木亭居酒屋 (清風街) (已結業)

離開銅鑼灣過少少，就係相對寧靜又小人啲嘅天后，搵到一間細細間嘅居酒屋，見價錢都唔太貴，就即管試一試佢。☀️☀️炎炎夏日，點都要飲番杯凍飲解暑，打完風嘅一日熱到好似40度咁，呢度有幾杯可愛嘅特飲，上面有一隻熊仔冰，超級可愛，我個杯凍綠茶牛奶，上面嘅熊仔冰就係由牛奶雪製而成，不過上枱冇耐就沉咗落水底🤣🤣🤣除咗壽司主食同沙律前菜，我哋叫咗今餐嘅必選推介，就係「石燒厚切和牛」，味道相當之好食！和軟熟、幾乎入口即溶，而且客人可以自己喺石燒上面稍為烹調，自行決定點餐廳提供嘅三款醬料，分別係芥末、醬油、蔥油、以及炸蒜片。我自己就最喜歡蔥油配搭和牛，切碎咗嘅蔥粒咬落去同和牛相輔相成，口感一流！依間餐廳無論環境、侍應嘅態度、同埋嘢食嘅質素，都好值得再次光顧，最值得推介嘅係打卡熊仔飲品，女士們一定好鍾意！