金龍冰室 (已結業)

是晚嚟到大圍區搵食。一向都知大圍區出名食肆林立，所以行咗一陣，離遠望到有間天藍色裝潢嘅冰室，感覺幾雅緻，於是就行咗入去。～～～🐨甫坐下，店員都即時奉上熱水兩杯，仲同我地介紹鐵板餐。但由於我地唔係太肚餓，所以諗住食個常餐就算。～～～🐨當時夜晚七點左右，常餐喺特定時間索價$45，但係其餘時間要額外加$10。我地都冇所謂，就加咗$10啦！一嚟就熱檸水同熱杏霜，都係用黑白淡奶厚身杯裝住，似乎可以保持溫度。跟手嚟咗兩碗米粉，由於瑞士汁雞翼同吉列豬扒係分開上，感覺兜米粉唔太吸引，而且米粉湯完全冇味。可能餐廳想你自己倒啲瑞士汁落去碗米粉度啦！～～～🐨最後嚟埋聲稱用咗「3.6北海道牛乳」嚟製作嘅炒蛋同奶醬厚多士，但係炒蛋唔覺有牛奶香味，甚至連蛋味都唔覺有。。。至於奶醬多，煉奶同花生醬都偏少，好乾身，完全不符合我對茶記常餐嘅期望。