茶廳 (已結業)

招牌豐哥雞飯見佢寫係招牌就即管叫黎試試，的確係唔錯喎，個飯係用雞湯煮，好香好正，手撕雞凍凍地，調味唔會太重，保持到雞肉既鮮嫩，仲有少量雲耳，流心煎蛋，再配埋個秘製醬汁，撈埋黎食勁正呀！招牌茶廳焗豬扒飯又係見佢寫招牌所以叫既，感覺上無咁易中伏呀嘛，加左20蚊改做黑毛豬扒，開頭都驚係茶餐廳叫黑毛豬會唔會出事，但當見到成品就無曬擔憂啦，焗飯即叫即製熱辣辣，職員都提左我地幾次小心熱，勁香勁多芝士，茄汁味道自然，充滿層次，有驚喜。豬扒帶骨，爽嫩有嚼勁，肉味自然，整體屬水準之上！馬拉盞炒通菜份量都幾多，炒得夠穫氣，少少辣勁惹味。涼粉紅豆冰配煉奶雪糕好好飲呀！d紅豆好大粒，煮得濃稠，入口即化，啖啖起沙，配埋煉奶雪糕，奶味香濃但又唔會好甜。檸檬可樂煲薑依家已經好少地方有得飲，雖然係一種好簡單既飲品，但充滿回憶，可樂好夠薑，飲完成身熱騰騰。薑汁法式焦糖燉蛋配豆腐雪糕，其實已經好飽，不過見呢度d甜品好特別又忍唔住叫左，好在都無令我失望，燉蛋質感軟滑，焦糖脆面燒得香脆，暖暖地，大推！啡走雪糕新地食食下諗左一陣，點解d啡得咁少，原來變左做啡凍，一啖雪糕一啖啡凍，未試過，口感都幾特別。