影片
更多
2010-06-27
53 瀏覽
由星級名廚Jacky Yu親自主理嘅囍宴廚藝私房菜，今天終於有機會試到。雖然價錢上比起其他囍宴地舖相差幾大，但我今次食完感覺係值回票價！而精彩晚宴就由呢一壺桂花烏龍茶開始，桂花味芬香撲鼻，但飲落去只有香濃烏龍茶味，桂花及烏龍茶分別同時佔據我嘅味覺同嗅覺，實在精彩！晚宴由４個頭盤，６個主菜及一個甜品組成，較早前已先通知本人唔食魚，所以菜單上亦跟客人要求而作出改動...清酒黃金一口鮑魚 - 用上日本萬字醬油，清酒，雞湯等材料，將已挑去內臟嘅九孔鮑一齊煮，最後淋上鮑魚汁，放上海膽同埋三文魚籽，單係睇賣相已經流晒口水...呢個鮑魚頭盤比平時酒家食果啲更覺簡單出眾，視覺上覺得矜貴，而海膽嘅鮮甜同肉質嫩腍美味嘅鮑魚好似發生一種微妙關係，鮮味無比，實在令人欲罷不能，同時亦係我今晚最欣賞嘅菜式之一。貴妃醉蝦 - 看似平平無奇，但食落有驚喜。用上海菜常用醃食物用嘅糟滷，加埋紹興酒，上湯，再加埋食落麻麻香香嘅花椒油醃成，用料上已覺得幾特別。而且蝦早已挑腸去腳，麻香酒香共冶一爐，正！瑤柱絲涼拌油菜花 - 普普通通嘅乾菜心同埋瑤柱汁，竟然可以製作出一個口感細密，涼快清新嘅頭盤，其實單憑我三言兩語，好難感受到呢
晚宴由４個頭盤，６個主菜及一個甜品組成，較早前已先通知本人唔食魚，所以菜單上亦跟客人要求而作出改動...
清酒黃金一口鮑魚 - 用上日本萬字醬油，清酒，雞湯等材料，將已挑去內臟嘅九孔鮑一齊煮，最後淋上鮑魚汁，放上海膽同埋三文魚籽，單係睇賣相已經流晒口水...呢個鮑魚頭盤比平時酒家食果啲更覺簡單出眾，視覺上覺得矜貴，而海膽嘅鮮甜同肉質嫩腍美味嘅鮑魚好似發生一種微妙關係，鮮味無比，實在令人欲罷不能，同時亦係我今晚最欣賞嘅菜式之一。
貴妃醉蝦 - 看似平平無奇，但食落有驚喜。用上海菜常用醃食物用嘅糟滷，加埋紹興酒，上湯，再加埋食落麻麻香香嘅花椒油醃成，用料上已覺得幾特別。而且蝦早已挑腸去腳，麻香酒香共冶一爐，正！
瑤柱絲涼拌油菜花 - 普普通通嘅乾菜心同埋瑤柱汁，竟然可以製作出一個口感細密，涼快清新嘅頭盤，其實單憑我三言兩語，好難感受到呢個菜式微妙之處。只要你中意食菜心，我肯定你會一食就戀上佢...哈哈！
芥末燈影牛肉 - 食落好似一塊好多汁嘅牛肉乾，而細味下又有好似芥末豆咁嘅味道。脆卜卜愈食愈愛，用黎佐酒更加係絕配...
講起佐酒，不得不多謝Jacky送俾我地嘅桂花荔枝陳酒，Jacky話枝酒係用新鮮荔枝一年前開始釀製而成，事實上飲落同平時飲淡白色果類荔枝酒好唔同，有少少桂圓味，好香好易入口，大家有機會就當然要試下喇～！！
食完幾個頭盤之後，到第一個主菜出場。呢味雲上東坡醉千層係得獎作品，賣相絕對係靚到嘩嘩聲，忍唔住用唔同角度影多幾張相...
雲上東坡醉千層跟傳統嘅東坡肉好唔同，唔用紹興酒改用日本清酒，豉油亦改用日本豉油，東坡肉去肥膏後切得薄薄做成塔狀，入面填得密密又入味無比嘅梅菜，再加上濃度剛好嘅汁，送飯就最啱不過，呢度亦跟左一大盤白飯，搞到大家好快就食得飽飽...哈
金牌口水雞 - 呢味雖然地舖都有得食，但呢度個賣相明顯靚得多，尤其上面果隻巨型辣椒，真係相當吸引。雞肉非常鮮嫩及有彈性，至於麻辣味辣得好有層次，剛食時唔覺咁辣，但愈食就愈刺激，加上芫茜皮蛋的香味，就算要不停冒住汗食都值得...
食完兩味味濃較濃嘅主菜，餐單上特別安排呢個時候送上金不換雪葩。雪葩杯入面有藍莓，芒果同埋奇異果粒，口感清新甜美。不過金不換味道較獨特，未必個個喜歡。聽Jacky所講，仲有好多種特別雪葩輪流替換，其中皮蛋紫薑味雪葩真係最吸引，好想試添....
蟹皇糯米飯 - 呢個糯米飯同我地平時食果個好唔同，用上蟹粉，蟹王油混入糯米再去蒸，就咁聽已知夠晒味，仲要果隻又大又多膏嘅蟹蒸完之後，蟹味倒流返入去飯身入面，真係鮮味到不得了！
清潤四果燉雞湯 - 何謂四果?正是蘋果雪梨無花果同埋木瓜，四款加埋已預計到係非常清甜，之前飲完咁多好野，依家飲返個滋補湯水，真係一個好好嘅享受...
最後一味主菜就係百合露筍炒鮮菌，最特別就係切得薄身嘅百合，食落去爽口得黎亦無左百合果種苦澀味，加埋各種鮮菌又香又新鮮，作為整晚最後一個菜式都不錯。
甜品係蕃薯薑湯黃金湯圓，蕃薯薑湯相信唔駛多介紹，但黃金湯圓到底有咩饀料咁特別？一咬落去感覺脆口，亦感覺到有陣微妙嘅咸味...一問之下，原來入面有糖冬瓜，咸蛋黃，芝麻花生同埋牛油，怪不得食落又香又滑又爽啦。而且有得外賣拎走的，承惠$38/十粒...唔貴喎~！
最後Jacky更親手送上貴賓卡同埋私房菜食譜，超開心呀！多謝晒~~
張貼
