音樂人家 (已結業)

朋友話依度好特別，好似去左另一國家咁。咁就黎試下係點。地方好大無柱，座位唔多，我地五個人坐一張圓檯，都唔算好逼，的檯椅都係木既，可能無梳化咁舒服，不過又唔係坐成世無所謂啦。音樂聲唔會太大聲，後來重有人唱歌，好有情調。而家要聽人唱現場真係好少地方有架，重係唱得好好，都係我熟悉既歌曲，中西都有，歌名可能就講唔出黎，不過好熟旋律。個日人都幾多，大家都好靜咁聽歌，講野細細聲咁，好奇怪，所以我重以為去左外國。我地叫左兩個焗飯，兩個小菜同一個咖喱，好少樓上cafe有咁多選擇。的食物問心講都幾好，當然有唔會好食到點樣，起碼夠熱夠份量，用料又唔幾多咁就算合格啦。睇唔到佢地廚房，原來佢地廚房係樓上，落單就通知樓上送過黎，咁都幾好，個場唔會有油煙味。個餐包飲品，我地叫左2杯好好玩既工藝茶，重有三壺花茶，飲完重有免費加水，幾好服務。本來以為會睇到人跳社交舞，不過個日無人跳舞，真係可惜。香港幽靜餐廳好少，睇怕依度都幾另類，希望能夠保持啦，下次拍拖食飯都會再黎依度。