東京一番 (已結業)

唔係朋友講都唔知原來深水埗開左間日式放題，仲要非常抵食，而加仲做緊優惠，like同share餐廳嘅facebook，晚上9:30時段第二位就有半價，聽到咁抵所以就同屋企人黎食番餐。初頭諗住呢個價錢，我地都唔會抱有好大期望，點知原來有驚喜。餐廳地方都幾大，餐檯座位夠闊，坐得幾舒服，食放題最驚叫多幾碟張檯就唔夠位放。我地9:30半去到，估唔到仲有咁多人，可能大家都係等緊個優惠時段。我地一坐低就點左勁多刺生，因為以往食放題好多時係點10件先黎得果幾件，但呢間真係寫幾多俾幾多，絕對唔會慳住慳住，仲有師傅真係好有心機，刺生盤係砌到靚一靚插哂花放哂乾冰咁上，d刺生仲非常新鮮，三文魚、甜蝦、赤貝、鮑魚片全部都好鮮甜，真係好正！仲有好多其他野食都好好食，好似呢碟牛油炒什菌，竟然咁香咁好食！秋刀魚、椒鹽蝦、炸菠蘿都係我覺得好好食嘅小食。烤羊架啖啖肉，肉質嫩又唔會有羊羶味，一定要試下。其他壽司好似花之戀、鰻魚、海膽手卷都一樣好食，秋葵天婦羅好特別。以呢個價錢食到呢個質數嘅放題，真係搵唔到第間，今餐全家人都食到好飽好滿足，非常之超值嘅放題！