暹 (裝修中)

今日早收工又唔想咁早返屋企，就約左友人去傾計食飯見下面，黎到尖沙咀呢道比我發現左呢間餐廳，係岩岩新開，裝修擺設都好靚，於是就入黎試下啦。一入門口店員熱情既招待就坐下來。首先我地叫左個酸辣無骨鳳爪，啲蔬菜好新鮮，酸酸辣辣咁十分開胃，而且鳳爪去曬骨，真係食得好放心。跟住叫左個泰式菠蘿炒飯，成個菠蘿即時開，呢道既炒飯係用新鮮菠蘿黎整，食落非常乾身粒粒米都好甘香，而且餸菜都好多，份量十足。之後叫多個小食燒汁原條鰻魚，有成兩大條咁多，非常抵食。賣相一流，食落非常好味。有啲口乾就叫左兩杯野飲，一杯係椰汁冰，唔算太甜，比較健康啲。非常冰凍。另一杯係石榴子冰，重有小小果肉係底，口感都唔錯。最後叫多個甜品椰汁西米糕同咪芒果汁西米糕，兩個口味我都好鐘意食，味道非常香濃。