燃味棧 (已搬遷) 新店位置

第一篇食評，希望可以支持下小店！相信大部分人就算唔係住荃灣，都總會聽過呢度有好多街頭小食。平時好少入荃灣嘅我，今日就因為心血來潮想掃街而嚟咗覓食～漫無目的咁行到一個巷仔位，男朋友拉住我話好似有好嘢食，一入到去就見到燃味棧。舖位唔大，價錢牌掛喺店面一目了然，其實又冇話咩好大陣食物香味吸引路人，但趕住醫肚嘅我地見價錢OK拿拿林就叫咗個「雞肉烤卷」食住先。由於即叫即做，雞肉都幾熱辣辣！見到老闆（應該係掛）好用心咁擺好所有材料喺卷皮度，我不禁諗起某啲連鎖食店做嘢是是旦旦，又貨不對版，啲料得個面有。相反，燃味棧用料好足，成個烤卷食到最底都有雞肉！十分抵讚。我地叫咗芥末沙律醬，好搭！唯一美中不足係雞肉喺醬料嘅襯托下冇乜味，當然，亦可以講係比較健康嘅。總括而言，好值得試下（仲有得加芝士添）！荃灣嘅朋友，又或者去開荃灣嘅朋友，有興趣嘅經過就買個試下啦！小本經營實在不容易，老闆好好，整完份烤卷同我地講咗句：「希望你地鍾意」，大概呢種就係小店獨有嘅人情味。