煮宮

營業中

休息中

朋友鍾意食私房菜，貪少啲食客，可以詳談盡興啲，所以今晚就嚟到駱駝漆’煮宮’揾食! 入到去環境好整齊，仲有得唱K打麻雀，第一印象唔錯!食物方面，當日揀嘅都係餐廳比較有名氣嘅菜式。餐前小食嘅炸豆腐粒香口，拍青瓜入味開胃。是日湯水’花膠響螺燉排翅’十分足料，除咗個名提及嘅材料，仲用咗元貝同雞翼，味道濃又唔肥膩。另外值得推介嘅係’金汁千層鮑魚’。鮑魚火候控制得好, 配上冬菇釀蝦膠同豆苗，所有朋友都食得舔舔脷！老闆知道其中一位朋友對蝦敏感，更額外煮一碟無蝦膠，好貼心！整體嚟講晚餐非常高質，老闆會留意每位客人食完上一道菜先出下一道，所有野食都好熱辣辣！