魂 (已搬遷) 新店位置

聽講魂既拉麵唔錯，去完書展行完一大輪又行左一大個圈黎到，晚上八點多，前面大概有十個人排緊，但等左大概10分鐘左右就可以入座。店入面空間較為狹窄，無論坐四人枱或者吧枱，人與人之間都幾親密的。不同湯底都有非常特別既名字，青龍（$99）就最吸引我，所以好自然就揀左佢。依度既拉麵配料係我食過最豐富既，除左好多鋪頭都會有既叉燒、粟米之類，仲有蘆筍、荷蘭豆、蟹肉，蘆筍上面仲要一小匙魚子醬。飲左一啖湯已經好驚喜，有好濃郁既豬骨味但唔油膩，硬度中等既麵條開頭食有少許硬左d，但繼續食就冇問題。叉燒一夾開好易變成肉絲，非常鬆軟又唔會太鹹；飲左濃郁既湯底可以食返蘆筍同荷蘭豆平衡返，略嫌荷蘭豆生左少少；我最期待既玉子相對比較鹹，我個人都食得鹹既但依個玉子都係重味左少許。其實而家食拉麵普遍都要近一百蚊一碗，魂既青龍雖然索價99蚊但我覺得係值既，佢既湯底會令人有再黎試其他味道既魔力，下次一定會再幫襯試下太極。