阿里郎熱狗棒 (已結業)

其實都係去到先知，原來呢檔嘢嘅店員係講韓文嘅，即刻感覺唔同晒，專業。用心。盡在此刻，咪就係呢啲囉。當然呢啲嘢都係門面擔當，係咪真材實料就梗係要試試佢啦。話說我都係突然口痕心癮起先搵佢出嚟食，至於點解係心癮？因為細個九龍塘火車站有檔有日本炸熱狗賣，我成日食，因而有少少情意結。不過韓國嘢我就一向都麻麻，所以都係得個「試」字，唔係話好大期望。我叫咗有車打芝士嗰一款，食物係即叫即炸，咬落都幾香口，芝士亦幾濃味，麵包煙煙韌韌，同埋我好記得細個食啲炸熱狗成日會有陣竹簽味，我好唔鍾意，呢隻就唔會喇，正呀，而且想味道再豐富啲，枱面仲有唔同醬可以揀添，不過個人就覺得就咁落茄汁都好夠喇～世事總係無完美，有讚嘅嘢當然都有彈嘅。第一，以呢個價錢嚟講食小食都算貴貴地，佢個Size亦絕對唔係可以輕食當一餐嘅size；第二，個麵包同條腸仔其實有啲脫離，如果可以包得更緊就好喇。總括而言，係咪好味到想不停翻焯呢？未必會～不過口癮又到嘅話，都會諗係佢嘅。