首爾家韓國料理

營業中

休息中

門口裝修好有韓國味道，以黑色為主，感覺高尚。入到餐廳，電子化燒烤爐，抽氣做得好好，完全冇煙，最重要係價錢溫馨。一坐低，首先送上六款韓國餐前小食，零舍中二魚乾，屬於比較大條，口感十足，送酒一流，另外泡菜唔太辣，岩晒我口味。一上枱係牛排骨湯，湯係熱辣辣鍋度不斷滾，牛味直撲鼻，香噴噴，牛排骨份量有成4-5件，所以湯好濃味，牛肉又煲到好淋好鬆化，有如入口即溶。叫左醃左牛肋骨同豬裡脊肉。侍應好親切過來幫手燒，所以火候控制好到位，牛肋骨吸收晒醃汁，十分入味，無需點任何汁料已經好正，忍唔住講句，牛好有牛味。牛肉汁全部鎖係牛肉度，嫩滑冇渣，香濃好味。豬裡脊肉冇醃過，都算肥瘦相間，薄薄一片，好易熟，屬於比較有口感，爽得來又唔油，點上少少韓國辣醬，寧舍開胃。最後整碟紫菜牛肉包飯，不過不失，可能俾啲靚牛填飽左緣故。食埋附送橙，為晚餐畫上完美句號。兩人食到捧住肚走，滿足之餘，價錢合理，環境又一流，下次一定再食。