沛

營業中

休息中

深水埗而家新開左好多打卡Cafe，出開黃金買啲電腦野，見倒哩間以白色同湖水綠色做主調嘅食店好靚咁，原來係一間韓國小店。佢地嘅座位唔多，全店都係得十個位。佢地嘅Menu好簡單，得一頁紙，不過蛋餅、炸雞、部隊鍋、飯卷、拌飯哩啲平時食韓國菜都會食嘅菜式都有，而且大部份都係幾十蚊有交易，仲要唔洗加一。前菜 - 有泡菜同芽菜，泡菜唔會太辣，芽菜幾清爽。芝士雞蛋卷($78) - 雞蛋卷都幾大份，有成隻前臂咁長，上面吱左好多番茄醬，雞蛋卷好嫩滑唔會煎到過晒火，入面嘅芝士有拉絲得黎係軟腍嘅，唔會好似食緊吹波膠咁，飽肚又好味。韓式無骨炸雞配甜辣醬($78/半份) - 半份炸雞都有七件，炸雞上枱時會連埋醃蘿蔔。炸雞熱辣辣，炸漿脆得黎唔會太厚太硬，中間肉質仲好juicy一啲都唔鞋口，甜辣醬以甜味為主，辣度只屬BB辣程度，都幾好食。香蕉牛奶沙冰($45) - 沙冰打得幾滑，唔會飲到冰碎，唔會太甜都飲倒香蕉味。總結，雖然只係一間小店，食物選擇亦唔多，但大路嘅韓國菜都有，蛋餅同炸雞質素怕得住韓國街嘅韓菜店，值得支持。