味真 (已結業)

最近屋企附近開左間韓國過江龍燒肉店，今晚有時間，就同老公去食吓先。餐廳光猛，地方大，環境整潔。呢度係由正宗韓國人主理，佢好nice，每樣食物同醬料都會為客人逐一介紹，仲會落手落腳燒埋肉，服務好好。醬料：有鹽、茄醬、沙律醬、甜辣炸醬、芝士同魚露，另外仲有青辣椒同蒜頭包埋生菜一齊食，真係想食咩味道都有。前菜：有泡菜、酸蘿蔔同沙律。老公話泡菜同酸蘿蔔都幾好食，沙律加左醋，酸酸地幾開胃。肉類：所有肉類係每份100g計，我哋叫左豬三層肉同豬梅肉各兩份。豬肉顏色新鮮，重肉味，燒嘅時候不停滲油，豬三層肉肥瘦均勻，口感軟硬適中。豬梅肉比較淋，脂肪部分就比較實正。兩款包住生菜食，食落又會話覺得好油膩，幾好食。豬皮：餐廳signature菜式，佢本身已經熟左。豬皮燒過幾香，口感彈牙，店員仲幫我哋點埋咖喱粉、黃豆粉同醬汁，好好食。肥牛麵豉湯：牛肉份量都算多，仲有豆腐、蘿蔔、洋蔥同大蔥等配料，麵豉湯味道極濃，帶鮮味，甜甜辣辣，越飲越辣，都幾惹味。韓式雞蛋羹：賣相漲卜卜，熱辣辣，雞蛋加左高湯一齊蒸，內裡有蔥，味道夠鹹，幾香蛋味，口感都滑架，幾特別。飲品：白桃梳打同甜米露都係來自韓國，白桃梳打唔會話好甜，OK喎。