首首.韓式小館 (已結業)

利東街重建之後，多咗好多特色餐廳，今日約咗朋友喺灣仔附近行街，所以決定就係睇吓有乜好食。行行下見到一間韓式餐廳，發現呢間韓式餐廳竟然加入左下午茶行列，所以決定入去試下。餐廳裝修型格，而且非常有情調，再加上柔和嘅燈光，非常浪漫。餐牌上菜式選擇好多，而且仲有High Tea Set。韓國仁川米酒，醇香綿軟，口感極佳。傳統韓國下午茶，以木製環形托架擺放八款精緻嘅鹹甜點。韓式甜辣炸雞，炸雞大少適中，每件到沾滿甜辣醬，外脆內軟。烤牛肉餅年糕卷，牛肉有咬勁，味道帶甜，內有年糕口感過癮。手工泡菜飯團，飯粒煙韌，配上辣辣嘅泡菜，味道一流。香脆芝麻海苔，海苔咬落香脆，配上芝麻更加香口。牛油果焗釀飛魚子醬太陽蛋，半熟嘅太陽蛋，以及焗過嘅牛油果增添左一份焦香，再配上飛魚子醬那淡淡的鹹香及海水味，各種味道十分配合。柿乾釀芝士及合桃，非常特別嘅配搭，軟林林嘅柿乾同芝士，加上合桃硬中帶軟，果仁味濃郁，味道非常特別。鮮草莓糯米糍，軟滑滑嘅外皮加上新鮮超甜嘅草莓，味道一流。迷你藍莓奶凍，口感幼細順滑嘅奶凍，加上濃郁嘅藍莓味，非常滋味。最後仲附送，化妝禮合，相當貼心。