九重鮮 (已結業)

九重鮮韓式海鮮塔去開黃埔打保齡順便過埋隔離試吓食海鮮塔，本身以為海鮮塔真係剩係得海鮮但係其實都仲有好多其他熟食，所以真係好適合一家大細一齊食。餐廳環境衛生，入邊十分闊落，中間就有幾張枱合併而成嘅一個熟食嘅自助吧，其中比較特別嘅係佢會有韓國好出名嘅魚肉串，每隔一段時間佢都會有人出嚟打鼓通知各位食客有新一輪嘅嘢食。而當日我地叫咗一個九重海鮮塔。首先係海鮮塔你之前有一個韓式泡菜煎餅，辣辣地嘅泡菜加埋香脆嘅煎餅，十分適合作為餐前小食。黑椒鹽肥牛+海蝦因為太肚餓所以冇影相😓，不過海蝦好新鮮肥牛亦都相當入味。聖子聖子鮮甜得來有咬口，比起平時食嘅聖子冇咁油膩。白蜆+多寶魚白蜆新鮮冇沙，多寶魚好鮮嫩，值得推薦。鮑魚+蔬菜拼盤鮑魚爽滑彈牙，蔬菜因為同上面幾層一齊清蒸嘅關係，其他海鮮嘅精華滲埋落去啲蔬菜入邊。沙巴肉蟹蟹鉗幾多肉，亦都食到鮮甜嘅蟹膏，總括來講呢個價錢食到咁多樣嘢都算唔錯。