韓家韓國料理 (已結業)

假日星期六同老闆去觀塘拎模型唯有同時間要搵下野買搵下好野食平衡返心理先😉😌😌點可以比佢自己一個開心架本身諗住去行下觀塘海濱浪漫下，轉工後近呢三年比較少黎呢度，沿路都新開左好多新餐廳，所以就揀係度食埋我地嘅晚餐喇。呢間係比較偏向韓國d家庭式小店形式，選擇唔多但應有嘅都有。價錢屬合理。佢其實有$138任食炸雞放題都幾吸引，但當時我地都唔係太餓就選擇左散叫。豆腐麻醬沙津 $58 - 麻醬沙津一向唔會死錯人, 重點蔬菜係新鮮嘅.韓式雞蛋卷 $78 - 雖然唔係咩特別菜式, 但呢道有d驚喜, 好香蛋味,加埋翠玉瓜同紅蘿蔔粒粒都會覺得健康d.  老闆火速鯨吞左5件. 無骨韓式炸雞 $78 - 柚子蜜糖味, 要讚一讚醬汁味道, 甜甜地估唔到同炸雞幾夾，味道幾清新. 炸雞唔厚粉同埋炸完保持到唔會乾爭爭, 但如果再入味d應該會更好,韓式炸年糕 $55 - 甜辣汁, 醬汁好香蒜泥味, 所以都好惹味, 不過真係唔好睇佢咁少一盤, 真係好飽肚架.總括黎講,  以價錢$120人頭嘅韓國野咁嘅質素, 算幾抵食！等我下次狀態好d,要黎挑戰下炸雞放題先. 小店要繼續加油啊！