新沙洞大排檔 (大政街)

營業中

休息中

經過大角咀見到有間走新派復古風嘅韓式大排檔，以江南style酒館裝修，好特別，平日夜晚門口亦大排長龍，等咗一陣先有位。小食試咗脆炸韓式紫菜卷同埋甜薯芝士條，韓式紫菜卷沾左薄薄既漿汁炸，外脆內軟，幾特別；甜薯芝士條口感煙靭，仲食到甜甜嘅味道。每次去韓國餐廳都一定叫韓式炸雞，今次試咗半份新沙洞炸雞 - 柚子味，雞炸得好脆，肉質保持有肉汁，柚子既酸甜中和返油膩感。主食試左宮廷燉牛肋骨鍋（2-3人份），用爐熱住，冬天食一流，湯好清甜，飲完吾覺得口渴，牛肋骨肉質好軟腍，配料仲有紅蘿蔔，白蘿蔔、蔥等等，非常高質。韓式炸醬麵麵質Q彈，有好多豬肉粒，醬汁味道甘甜。甜品要左養生既蜂巢特飲 - 草莓牛奶配蜂巢特飲（2人份），牛奶入面有士多啤梨碎粒，口感滋潤仲飲到少少蜂蜜甜味。甜品要左黑糖蜜黃豆粉麻薯刨冰，超級大碗，黑糖味突出，配料小丸子非常煙靭。