九重鮮 (已結業)

蒸氣鍋開到成行成巿，要突圍而出緊係要攪攪新意思，呢間响大坑發跡的韓式蒸氣鍋一直都很想試，難得經過紅磡都有分店一定要捧場。睇得出呢度的每位待應都深受韓國文化熏陶，從化妝、髪型、舉止都俾到你致身於韓國的感受，微細如待應會幫小朋友拉開蘋果汁易拉蓋，又會幫客人斟水等等，比起日式餐廳口號式大叫「易拉沙醫媽咮」(irrassyaimase)有heart得多，抵讚！我地點左江南style及首爾塔兩款，好快就黎左兩座不銹鋼蒸籠小塔，塔上面溫度計度籠內溫度，大人細路坐定定，好期待溫度上升至95度。一層又一層海鮮好鮮美，有扇貝、帶子、蝦等。清蒸海鮮只要夠新鮮想唔好味都難，平時唔多食野的小朋友都爭住食。粥底由蒸海鮮的精華匯聚而成，用上等珍珠米滾足一小時固然綿滑，簡簡單單一個豬手粥已經令所有人著迷。其實蒸氣鍋比打邊爐更健康，更能食到食物的「鮮」味，少油少鹽值得推廣！