炑八韓烤 (蝴蝶廣場) (已結業)

今日晨早就入屯門做野，早餐都未食，Lunch決定要搵間食飽啲。做完野附近就係蝴蝶廣場，入去兜兩個圈就揀咗食間韓式餐廳。個人食野鍾意清淡啲，健康啲。所以嗌咗依個：韓牛雪濃湯配飯。有湯有飯，係冇食早餐情況下會比較易入口，感覺冇咁傷腸胃。一上菜原來唔只飯同湯，仲有前菜同韓式清湯，視覺上已經好豐富。 雖然餐廳係連鎖，但係野食唔會好馬虎。主菜韓牛湯，牛嘅份量相當足夠，入面亦有粉絲同蘿蔔，粉絲唔會因為浸太耐湯而變得淰身。細食嘅朋友可能淨係個湯都夠食。不過個人認為韓式飯係另一個特點，特點在飯上面嘅紫菜碎，連埋芝麻入口相當香口，如果紫菜碎多啲就咁食白飯都得哈哈。食晒所有野絕對飽過平時係茶記食個碟頭飯！餐廳除咗屯門之外，係港九新界都有分店，屯門個人黎講都叫遠，想再食下次唔洗專登入黎。