韓舍 (已結業)

除左日本菜，最愛既就係韓國菜，特別係韓燒，選擇多，即燒即食又夠惹味。韓舍係我最愛既韓燒之一，第一次光顧係三年前，難得可以一直保持水準。鋪頭空間感同時代感十足，乾淨企理。有3款基本醬料，自助吧亦有多款調味料選擇。凍櫃有多款精美甜點選擇，小朋友最愛彩色啫喱，我就最欣賞忌廉泡芺，泡芺鬆軟，忌廉夠綿滑。 沙律吧同壽司吧雖然選擇唔算多，但食物新鮮有質素，仲有一大盤冰凍住，保持新鮮。曲奇同蛋糕，細細件一啖一件，鬆軟香脆，又唔會過甜，真係唔覺意食多左都唔覺。熟食區有多款選擇，咖哩角春卷外脆內軟，好香口，咖哩豬皮魚蛋有驚喜，好有車仔檔風味。主角韓燒區，食材眾多選擇，款款望落到飽滿多汁，好吸引。魷魚非常非常驚喜，爽口入味，唔覺意燒耐左都唔會乾爭爭。豬扒鬆軟多汁，肥瘦適中。金沙骨醃得好惹味，味道甜甜辣辣，正！值得一讚係個抽氣系統，外型時尚，最緊要係抽油煙一流，唔會攪到成臉油煙。食物水準依然，店員亦非常細心有禮，呢餐真係抵食又開心。