一輝燒味小廚茶餐廳 (已結業)

首先，馬鞍山並非交通要衝，亦無特色景點，所以在整個馬鞍山內的食店都只屬街坊醫肚型，即並無任何食店，值得區外人花時間車資到此專程光顧的。但在一山還有一山低之中，總有一兩間比較似樣的，若然你某日流落馬鞍山，亦可以順道一試，專程則無謂。其中一間即一輝燒味。燒味店在馬鞍山中心區大大話話有8-10間，但可以堂食的只此一家。面對其他15-19一個雙拼飯盒，一輝連熱飲3x一碟都可以生存咗3-4年，證明佢有一定水準，不過，坦白講，絶不能跟外面以燒味出名的老店相比。我覺得灣仔的再興燒臘一定好過佢。咁如果再興你都認為唔啱食，哩間你千祈咪入。油雞、燒肉我都覺得唔錯，衰在碟頭較細。肉少，無得講，通脹一句解釋晒，但飯都少就真係...大隻男如我，真係唔多飽。熱奶茶亦有些少水準。馬鞍山內係好多茶餐廳，不過大部份店鋪的奶茶都比大家樂差。比較令人唔想幫襯嘅係嗰位負責收錢的話事人。黑口黑面的婆婆級，我對街坊生意一向無咩要求，但佢真係好似每個俾錢佢嘅人都係欠咗佢咁。