白鬍子炸魚薯條 (已結業)

喺香港唔同地方都食過炸魚薯條，但有唔少嘅炸漿都超厚之餘，仲要食落超油膩，所以好難食。之前同事食過後話白鬍子嘅炸魚薯條整得唔錯，搞到我好想去試下，趁今日放假就去咗食喇。(P.S 薯條係Mr.J嘅最愛，魚係我嘅最愛，所以特登去食都無問題啦)就算連炸魚薯條都有5種唔同嘅選擇，今日揀咗檸檬黑椒炸魚薯條，另外叫咗魷魚圈籃同香蒜牛油薯條。食店附近都有幾張公用枱方便大家坐低食。等咗一陣，就有得食喇。第一時間就聞到香蒜牛油薯條嘅香味，因為薯條係炸完之後再用香蒜牛油撈，所以要盡快食，否則會痴埋一齊。薯條係粗身連皮嘅，雖然係炸完再撈牛油，但都唔會太淋，好好味。主角當然係炸魚薯條，今次要檸檬黑椒味，因為比較特別，出面少有嘛。微微嘅黑椒味再加上檸檬汁，無搶走炸魚的味道，檸檬汁仲將魚嘅腥味帶走咗。另一方面，炸魚嘅炸漿好薄，食落唔油膩仲有少少魚的鮮味，味道做得好平均。薯條當然都炸得剛剛好，好好味。至於魷魚圈，炸漿都係好薄，屬於鬆化嘅一類。咬落魷魚圈仲係彈牙，再唧檸檬汁上去，除去咗腥味同油膩感，不錯。P.S 一路等食物時，不斷有好多外國人落單，可能香港比較少有依類專賣炸魚薯條嘅舖頭，間唔中食可以醫下思鄉病。