樂香園咖啡室 (已結業)

係我唔o岩, 本應已經諗好唔去試重開既樂香園咖啡室.講真, 若非對蛇竇有廿多年感情, 實在冇乜興趣俾意見而家呢班用"樂香園"呢個名run緊既人. 唔理佢地當中有幾多人係舊鋪過o黎, 打正旗號吃老本, 客人就期望有老店既水準.蛇竇之所以係蛇竇, 冷氣係重要既一環, 經紀陳如我入到店內, 清涼舒適, 茶香酥皮香麵包香撲鼻, 坐低飲杯奶茶食件雜批, 等蛇王抖擻精神, 再戰中環.如今冷氣不足, 奶茶味淡, 茶走又鍊奶唔够, 最失望係D雜批居然只係擺響玻璃柜: 雜批係酥皮, 餡料油份又高, 俾客食既時候唔熱既話, 咁個批皮會唔香, 批餡會入口肥膩, 唔好食o架喎大佬... 真係有D懷念以前個擺堂食麵包餅點o既電熱柜. 至o個碗"清水"公仔麵, 救命, 真係唔好提, 反正舊店好似都冇好食過...老店重開, 出品有跡可循, 新人做唔翻, 故然令食客失望, 但舊老板既然其實仲係度, 經紀陳仲有希望, 除非佢從來冇用心, 根本唔知自己以前點解會成功. 我明白餐廳食品招乎全人手操作, 經營管理難度好高.我諗我開始要逼自己接受習慣o左既好事物係註定有一日會失去o既, 有美好回憶, 人生已經係無憾.