長發麵家 (已結業)

長發熱賣手打墨丸同手打魚蛋，只可揀一樣，墨丸少機會食，就食墨丸啦。好好彩落單後再賣多一碗墨丸麵，店員就大叫墨丸沽清！落咗單，要等一段時間先有得食。留意返，碗麵份量真係唔大，千萬唔好期望一碗夠飽。現場所見，男食客一般都會叫兩碗麵。粗麵鹼水味少，湯底夠熱，味精唔算落得太重手。墨丸每粒大細唔同，有嚼頭。見枱面有辣椒油，加少少入湯，成碗麵即時生猛晒，辣椒油唔係死辣，有一朕吸引你食的香味。嗜辣的，必食。嚟食麵，相信都係鍾情坐街邊開飯的風味，仲可以睇到店家點樣準備食物。今日撞正店家在處理門鱔，一邊仲同街坊閒話家常添。