石磨坊 (已結業)

呢間係第一間店，食咗都有幾年。當年佢未有分店嗰陣，真係週時夜晚擺枱擺到週圍都係，仲要幾十人等位等外賣，情況同松記差唔多。樓上啲人一路都有投訴，我仲見過貼大字報出嚟話再嘈親就掟嘢落嚟。後來後舖開多個位，有啲詭異咁。再過咗一排就先後開多兩間，而家都好少再幫襯呢間。嚟呢度食，當然係食個刨冰。咁多隻味都食過晒，都係雜果或芒果最好食，栗子略嫌「漏」咗少少。不過佢哋入啲生果唔算靚，導致食物質素唔穩定。啲糊唔算特別好食，同大良八記差唔多。不過講真我又覺得好難會有特別好食嘅糊，特別難食嘅我就食過好多…仲有自己都幾鍾意食個奶皇蛋白燉奶。前排行過見少咗好多爛仔。以前好多賣老翻嘅細路走鬼嗰陣避入嚟，唔叫嘢食剩係食煙講嘢大大聲好多懶音，而家都冇晒咯。下次再行過入去食返個冰for old time's sake先。