Soul9+ (已結業)

A姐：M佬，你好衰㗎，做乜帶我嚟後巷姐，人地拍醜㗎。M佬：（心諗：你都會知醜㗎咩？）你無聽過後巷有好多驚喜㗎咩？A姐：咦！好衰㗎！咁刺激㗎咩？M佬：食餐飯姐，有幾刺激？不過，驚喜在於呢間餐廳！A姐：食……餐……飯？！係呀！就係食餐飯！北角除咗電車路兩旁同渣華道街市之外，呢條錦屏街近年都聲名大噪，短短嘅一條後巷，有5至6間異國風情嘅餐廳。今日就同A姐嚟到試吓呢間叫靈魂 Soul9+嘅意大利菜。餐廳分為室內及室外部份，好似啲外國露天茶座。而入到去室內部份，我就聽到A姐嘩……嘩……嘩……咗好多聲，唔通佢鍾意牆身夠Raw嘅設計，定係嗰啲黑白寶麗來相？當然通通都唔係，佢嘩係因為個小鮮肉大廚！呢位90後嘅小鮮肉大廚，由待應做起，邊學邊做到依家，A姐話好欣賞佢嘅上進呀！炸鬆脆檸檬雞翼：雞翼上面有啲芝士同檸檬碎粒，雞翼炸得好香口好脆，配埋清新嘅檸檬香味，真係好開胃呀！半生熟帶子鮮茄扁意粉：半生熟又大大粒嘅帶子好鮮甜呀，煎得好香又唔靭；而用新鮮番茄整成嘅茄汁酸酸甜甜，好好味呀！燒美國豬鞍扒：厚切嘅豬鞍扒一啲都唔靭，配埋特製嘅香橙燒汁，味道出奇地咁夾！豬鞍扒烤完都仲好鮮嫩香口，仲有烤雜菜同薯條真係飽飽喇！