十三少酸菜魚 (已結業)

好似好耐冇食過酸菜魚咁，諗起之前喺呢度試過印象中係幾好味，所以帶埋🐢🍯過嚟試吓。我哋兩個人今日都好肚餓，所以嗌左個勁量版。佢個碗真係超級大，仲大過個洗面盆。魚片都好多塊，塊塊都大大片， 又夠晒滑，不枉我咁遠水路過到嚟。而佢啲酸菜都唔錯，唔會太咸，酸度都啱啱好，仲要好多都大大塊嘅添。入邊唔使加錢已經包咗我最喜歡嘅萵筍，啲萵筍都好爽口，食落沾滿湯，酸酸地咁，好開胃。最難得嘅係佢呢度啲湯都飲得嘅，酸辣得來仲有魚嘅鮮甜味，未開始食魚都飲咗一碗湯先。另外我哋仲加咗佢個口水雞，佢呢度嘅口水雞唔會好辣，但係啲雞就好嫩滑，而且仲見到佢皮同肉之間有一層啫喱，聽講嗰啲係骨膠原嚟嘅，都幾好食㗎。呢個價錢雖然貴咗少少，但係喺香港食到咁嘅味道都好難得。