千樂燒味餐室 (已結業)

今日同朋友嚟呢間燒味店係佢極力推薦嘅，緣由就係上次佢嚟叫咗一個叉燒飯，老闆娘就比咗叉腩佢，佢一試難忘，所以決定帶我嚟再食一次。佢聽老闆娘講，叉腩係極限量供應，呢個部位真係可遇不可求，唔係成日都有得食。於是我地唸住早啲去食個中午飯，大約一點嚟到。我就叫咗叉燒瀨粉，佢就叫咗燒鵝脾叉燒飯。我地都賭究竟邊個會食到叉腩，我就賭兩個都無。點知上到嚟兩個都有叉腩，我一開始見到有啲驚，因為好多肥肉啊！但老闆娘見到我面有難色，同我講：啲肥油燒晒出嚟噶啦，食落唔會覺得肥架。於是我就放心擺一個落口，真係有種入口即溶嘅感覺，完全唔覺得肥膩，而係有綿滑鬆軟嘅口感。加上微微燶邊，食落又香口。真係怪唔之得朋友想一試再試。