禮食品市場 (已結業)

禮食品市場位於九龍灣工廈，樓上賣食材，樓下做餐廳，聽講鎮店之寶係鰻魚飯，無奈我唔鍾意食，於是叫咗個廚師推介嘅牛肉丼。呢度自助落單，畀完錢，可以出門口位置攞麵豉湯同綠茶，又係全自助。特別要講下個湯，海帶同車輪麥麩都係任落唔嬲，非常慷慨👍。我唔小心落多咗麥麩🙈，成碗湯非常足料，飲完之後已經飽咗幾成🤣。至於個丼，飯同餸嘅份量都算多，面頭嘅牛肉色澤較一般深，可能因為用日本醬油煮得耐咗，的確好入味，但係肉質就因而嚡咗少少。底下嘅飯就冇得彈，係有飯味嘅日本米，粒粒飽滿彈牙😋，好似我呢啲飯桶就非常滿意。