Tipping Point Brewing Co. (已結業)

一入門口就見到個好搶眼的酒吧區，如果唔係食完晏要返工，一定會飲返杯先。午餐有十個選擇，包羅意粉、飯、牛扒同漢堡。牛扒餐選用西冷扒配蘑菇汁，塊牛有成隻手掌咁大，唔係薄衣衣，店員放佢上枱時，已經傳出好香的煎烤味。攤咗一陣後開動，切開五成熟扒身，見入面仲有粉紅色，好吸引。食落軟熟，肉汁豐富。配菜炸粗薯夠晒香脆，可惜落鹽重手咗啲啲，沾蘑菇汁食好味過點茄汁。手撕豬肉漢堡包係將豬肩肉撕碎慢慢煙熏，肉量多，食落有好強的香料味。最驚喜係個 Brioche Bun，香甜軟熟，吸收晒豬肉汁的精華。講起麵包，跟餐沙律嗰塊小多士都咪走寶，喺將香草包厚切變厚多士，攞上手仲有微暖，咬一啖即 feel 到外脆內軟，仲冇加牛油。沙律菜就正正常常，葉身冇變黑亦冇發黃。　呢餐以咖啡代酒，佢香濃得嚟酸度適中易入口，趕走晒肉食留底的重口味。開開心咁食餐好，叉足電就返去開工 lu。舖頭係舊中區警署建群組對出，閒日午巿唔多人，兩個人嚟到變包場絕對有可能。