常樂素食 (已結業)

自問平時做開食肉獸，梗係覺得晚餐要有肉食先滿足。女友話呢間主打台式風味既素菜館可以滿足我另類既「肉望」，所以專情約左我上黎撐枱腳。入到黎驟眼睇同外面一般中菜館差不多，燈光通明，坐位闊落，一坐低就有侍應問飲咩茶。由於已經晚上八九幾點，同女友睇完餐牌好快點左三個小菜加兩個白飯。一上碟，口諗呢碟「鴻運當頭」($88)乜咁似台灣街邊鹽酥雞，佢上面仲鋪左d炸到脆卜卜既九層塔，十分惹味。原來咬開裡面係素雞，雖然食落冇雞味，但合埋眼食真係好易誤以為食緊雞呢。雖然「真的假不了」，但之後黎個碟叫「功德滿林」($78)又試以假亂真，睇落同魚香茄子十分似。原來佢係用左大豆蛋白同辣椒做芡，令到夾起茄子個陣有個種黏黏地感覺，食落都好入味，夠晒火喉。最後呢碟「三杯猴頭茹煲」，整法好似「三杯雞」，只係今次換左猴頭茹做主角，由於加左三色椒同姜蔥蒜，睇落都幾吸引，只係味道香到略嫌搶左猴頭茹本身味道，但女友同我都鐘意食濃味，所以都忍唔住食清光。食完呢餐，再諗起呢度鋪名叫「常樂素食」，當堂有種好知足既滋味。