麻市滋味館 (已結業)

位置位於佐敦站油麻地站同柯士甸站正中心既麻市滋味館，其實只係距離百老匯電影中心過兩條街。位置雖然係比較難去，但係你食完餐飯都會覺得行咁遠係值得嘅。點解我會咁講?一齊嚟睇我嘅食評先啦。入面坐得都幾舒服，有卡位梳化凳。黎到既時候仲早，所以得一兩圍坐底左。半個鐘後，成間餐廳已滿，冇book位既都冇得入。我地坐正對住魚缸既餐牌。由於下場我地仲約左朋友食甜品，所以我地揀左啲冇咁飽肚既食物。睇過openrice既食評，我最後揀左必食既冰鎮鮑魚，白灼蝦同鹽焗蟹，再加多個金銀蛋 莧菜就岩岩好喇。冰鎮鮑魚冇錯真係必食既。鮑魚洗得乾淨，完全冇沙石痴住，可以一啖放落口，當然我冇咁做喇。鮑魚充滿海水鮮味係肉甜，口感彈牙豐富，夠晒肥美。每一啖都係絕佳美味，點埋芥辣豉油，鮮味散發晒出黎。食完一隻都真係唔夠喉。叫白灼蝦既原因就係想試下佢地呢啲蝦度夠唔夠鮮。食開白灼蝦都係細細隻，呢度9隻蝦，隻隻都成隻男人中指咁大隻，有一半蝦有蝦膏。味道當然係鮮甜無比，蝦肉夠實。點埋辣椒豉油更顯鮮味，亦正正係點解我地唔點黃金蝦既原因。黎到緊係要食蟹!鹽焗蟹好少係第二度地方食到，今次亦係我係第一次試。原來咁簡單既整法亦令蟹保留原有鮮味。