升 (已結業)

朋友話想食omakase，但我又唔係好想食過千蚊，所以決定食lunch，食平啲啲~佢就帶我嚟呢間旺角嘅小店，睇睇餐牌lunch omakase最平$290，嘩 平到咁！揀咗$390嘅試吓質素先～餐廳細細間無太多座位，靜靜地，都唔錯，不過一定要訂位，好快full！前菜七味大豆芽同柚子醋沙律，一辣一酸，開開胃先！跟住有新鮮蒸起嘅松葉蟹肉蒸蛋，香滑嘅蒸蛋有上一絲絲蟹絲。三款特上刺身，我都好鍾意！炙燒過嘅金目鯛係背位，口感帶點煙韌，襯埋下面煙霧離漫嘅植物盆景，打卡一流。慢煮一個鐘嘅鮟鱇魚肝，無腥味，帶點香甜，口感細滑。煙燻嘅鰹魚，一開蓋煙霧輕飄，軟腍魚肉配上自家製洋蔥汁，上面放咗一啲茗荷，而我最鍾意嘅就係紫蘇花，多一抹清新香氣。刺身之後先食返甘露煮嘅青桃同埋無花果清清口腔味道。再嚟七款手握壽司：鮮赤貝、蜜甘鯛、甜蝦、車海老、秋刀魚、拖羅、白海膽，同埋拖羅手卷，每款都已經調味，唔駛再蘸豉油喇~麵豉湯偏咸。最後以宇治抹茶布甸作結，香滑又有茶香味，加埋大大粒嘅北海道紅豆同金箔裝飾。好抵食嘅omakase，有機會要試埋dinner先得！