濠客蒸氣海鮮 (已結業)

一直都覺得食蒸氣海鮮鍋其實料靚就得, 無技術廚藝可言, 所以如果想食, 自己係街市買返屋企蒸就得. 但係今晚想食蒸氣海鮮鍋, 太夜又買唔到海鮮, 唯有破例出街食喇. 見呢間新開張, 入去睇睇.有6款套餐可以揀, 當然越貴就有越靚既海鮮, 今次叫左黃金套餐(每人份量): 奄仔蟹(1隻), 澳洲龍蝦(半隻), 鮑魚(1隻), 元貝(1隻), 北寄貝(1隻), 象拔仔(1隻), 海蝦(2隻), 青口(1隻), 蔬菜籃, 粥底, 汽水. 其實份量都唔少, 食完都好飽.個蒸爐火力好強勁, 每種海鮮都有指定蒸煮時間, 確保唔會過火而變差. 爐本身有時間制, set好時間, 一夠鐘就自動熄火, 跟住可以慢慢食. 屋企就無呢款強力蒸爐, 係舖頭既優點.佢既海鮮都算新鮮, 蟹, 蝦, 龍蝦都好多膏, 好滿足. 但係其他貝類就差D, 無乜味道, 同洗得唔夠乾淨, 蔬菜份量都比較少, 原本粥底係蒸氣海鮮既精髓, 但係可能米既質素問題, 做唔到完美既結局.