Sodam Chicken (已結業)

朋友係食肉獸，提議去呢間任食炸雞試下，平時兩個人出去叫份韓國炸雞都$2xx，呢度每人$128就可以任食炸雞仲有六款口味同🍕Pizza供選擇，加$28仲可以食埋焗雞同10款前菜同小食，見到薯條、海蜇同酸蘿蔔吸引到我即刻加咗。店員提醒我哋如果食淨每件炸雞要收返$10，所以我哋都三件三件咁叫以免浪費，佢個盤好有心思咁隔開唔同醬汁嘅炸雞，每件都無骨啖啖肉，食得好暢快！雖然係任食但每件炸雞仍然保持水準每次上檯都熱辣辣，每款醬汁各有特色，最鍾意黑糖炸雞、青檸炸雞同濃蒜炸雞；焗雞雖然無咁香口但就較嫰滑多汁，黃金鹹蛋焗雞同BBQ香辣焗雞都唔錯。我食4-5件已經飽左，朋友食左8件表示暢快。另外仲叫咗蜜糖芥末薯條🍟，即叫即炸配埋蜜糖芥末醬，幾飽都食唔停口。食雞食到漏有泡菜、海蜇、酸蘿蔔、沙律中和一下，所以我覺得係必須+$28嘅。另叫咗兩杯飲品（買一送一）- 菊花蜜特飲同蜜桃特飲，賣相浮誇打卡一流，蜜桃特飲仲有條彩虹雪條放左入去，感覺啲青春返晒嚟😆💁🏻‍♀️埋單每人大概$200，食物質素都算唔錯，上菜速度快，食得非常暢快，兩個人可以食到好多款唔同口味嘅炸雞同小食，啱晒鍾意食得盡情嘅朋友。