和田日本料理 (已結業)

見價錢好似都唔係太貴，兼幾近屋企，星期日晚嚟試，但奇怪晚市竟然唔滿，不過咁重好，唔駛迫餐懵。坐低先叫嘢飲，有啤酒汽水果汁同麥茶任飲，啤酒係Kirin，唔錯。另外重叫咗一個$15嘅暖sake，不過只係一般，唔推薦。我食日式放題主要食刺身同燒物，其他食品例如壽司、麵、鍋物個d就冇試；但見點菜紙上都幾多款式。刺身係大路嘢，款式唔算多，記得嘅有三文、吞拿、希靈、八爪魚、北寄貝同劍魚，好似重有其他一二款但記唔起。刺身算新鮮，重咗北寄貝比較麻麻外，其他都唔錯，印象較深有吞拿同劍魚，幾肥美。燒物最正係燒牛扒，有牛味燒得夠香，encore咗幾次，另外燒鯖魚、東菇、雞軟骨亦好食。招呼算ok，落柯打都唔駛點等，食物嚟得幾快，又冇漏單，呢樣抵讚每人連加一$200，以呢個價位同埋食物水準嚟講，都算抵食；而且唔係太迫人，值得一試。