喜來稀肉 (已結業)

今晚我們同一個好多年無見嘅好朋友食飯，我們去咗旺角廣華街嘅「喜來稀肉」食韓式燒烤！我們叫咗喜來烤肉、牛五花、牛肉眼、牛舌、牛肋骨肉、五花肉、豬頸肉、炒年糕同石鍋拌飯！喜來烤肉嘅賣相超級精緻吸引，因他們將幾片薄身牛肉堆砌成一朵玫瑰花，真係非常有心思，而肉質就好有彈性，肉味亦好濃郁！牛五花係好薄身嘅五花肉，肉質相當軟滑，雖然脂肪比較多，但唔會有好油膩嘅感覺！牛肉眼真係超大塊，肉質好鬆軟嫩滑！牛舌亦都係切得好薄身，肉質好爽口嫩滑！牛肋骨肉嘅脂肪分佈非常平均，肉汁亦相當多！五花肉嘅肉質都幾厚身，口感好豐富，而且充滿著油香！豬頸肉嘅肉質好軟滑爽口！炒年糕嘅醬汁味道相當惹味同唔會過辣，韓式魚蛋、牛肋肉同非常煙韌彈牙嘅年糕，吸收晒惹味嘅辣醬，真係超好味呀！係本人嘅必食推介！石鍋拌飯嘅材料相當豐富，飯焦亦好香脆！爐邊嘅蛋，一邊係泡菜，一邊係芝士，泡菜就比較惹味，而芝士就比較軟滑！