博多拉麵別天神 (已結業)

上次喺中環食過超日本裝修嘅別天神之後，今日就帶男朋友嚟食尖沙咀分店。呢間舖都係店面細細，但佢特別在有得許願，俾你寫完貼上牆度集氣。今日坐底後店員話蝦蝦拉麵賣晒，得返豬骨湯底，所以我地兩個都嗌左同一款麵，同埋一個小龍蝦沙律同餃子。我最喜歡嘅係佢嘅茶水係冰嘅，岩晒熱死辣辣嘅天氣，坐低飲返杯降下溫。今次個沙律我食到四隻小龍蝦，同埋佢啲粒粒蟹子，食落脆卜卜咁，好味👍🏼而佢個餃子，唔好睇佢外表平平無奇，其實佢好足料，隻隻都「實的的」架。好啦，拉麵到啦，我好鐘意佢個湯，真係好濃豬骨味，啲麵質都煮到岩岩好彈牙，叉燒都又軟腍又份味。雖然我地嗌左同一個麵，但係男朋友就跟左佢個教學整隱藏湯底。加完拉麵汁同蒜蓉同埋佢個秘製芽菜，完全係另一個味道嚟，濃好多，都好好食。搞到我下次都想試下整佢個辛辣湯底。最後食完，當然要許返個願，集個氣。我相信呢啲都係呢排香港人嘅集體願望。