群記牛肉圓豬手

營業中

休息中

一有時間就會揸車過粉嶺食群記豬手米，真係好好味，食極都唔厭！今日特登十一點半就黎到，唔使等位，不過都差唔多坐滿，因為如果到左lunch Time就會好多人，呢度係唔會派飛仔等位，係自己企入去等位，所以一多人就會食得好大壓力，要食到好快，要快啲讓個位俾人咁。同埋係冇冷氣嘅，熱天食係會食到流晒汗！不過真係太好味，流晒汗咁食都值得嘅！啲粉麵係有分大細嘅，我地叫咗2個大豬手米，牛肉炸卷同埋細淨牛肉圓。豬手米個湯係青到不得了，好青香！好好飲！唔知係咪用啲豬手煲成，但係一啲都唔肥完全冇油膩嘅感覺。啲豬手好爽好香！豬皮好脆口好爽，食細碗嘅話真係唔夠喉呀！而最重要係個辣椒油，簡直係神來之筆，我本身唔係非常之食得辣，佢個辣椒油唔係好辣，係小辣再加蒜蓉香，加落去米粉同豬手度真係好夾好好食！正到我次次都可以成碟辣椒油食晒呀！肉丸都好好味，細細粒，非常彈牙！而炸卷我就覺得冇乜特別，不過係好新鮮即炸嘅，所以外面的腐皮係超脆，而入面的牛肉感覺好粗，點醋食，都幾好味。呢個成日都好快賣晒，應該係有限量供應。最後加支支裝忌廉，就Perfect 喇！