樂香園咖啡室 (已結業)

蛇竇嘅滑蛋碟頭飯系列真係食極都唔厭！特別係滑蛋蝦仁飯，啲蝦仁非常大隻，雖然估計都係雪藏貨，但係質素非常好，爽口鮮甜！其實，有煮開餸嘅朋友都會知道，其實靚嘅雪藏蝦可以比新鮮蝦更爽口！滑蛋炒得剛剛好，食到炒蛋本身嘅質感之餘，又保留到部分蛋汁。呢啲係中式嘅炒滑蛋，唔似西式要加牛奶加忌廉嚟扮滑，不過，唔排除可能加左一啲生粉水，同樣做到中式嘅滑滑嘅效果！但就唔會好似以前啲滑蛋牛肉飯咁樣，生粉水多個蛋，炒出來似蛋花芡多啲！此外，蔥花對於我來講，越多越好，夠晒香！仲有，佢有自己製作嘅豉油，應該都係老抽底加啲生抽，唔算太特別，但係加入埋佢嘅辣椒油，又好似產生左啲化學作用，好配合，用時下飲食節目最行貨嘅講法，就係：嘩！加咗秘製豉油同辣椒油，將整碟飯嘅味道提升哂！其實，我覺得啲辣椒油係香多個辣，所以好好味！如果你係食肉獸，可以另加煎火腿、煎午餐肉、煎香腸、煎孖腸都仲得！至於滑蛋飯系列嘅其他配搭，仲有牛肉同叉燒。最後，記得，唔食蔥嘅一定要嗌走蔥，因為蔥花係碟飯本身有嘅！