象泰 (已結業)

今時今日食泰國菜，又使乜去到九龍城啊，今日我嚟到屯門嘅呢一間象泰，環境舒適，地方闊落，最緊要嘅係佢嘅食物充滿風味啊。食泰國菜，又點少得食返個蒜蓉包先啦，佢哋嘅蒜蓉包比較特別，四四方方，用一般嘅白麵包來做嘅，唔係好似一般嘅餐廳，用法包做，一上枱已經充滿濃濃嘅牛油同蒜蓉香味，佢嘅牛油每一面都揸到架，十分之均勻，外脆內軟， 10分滋味。軟殼蟹紙米卷，新鮮包起，即叫即製，因為紙米卷依然好濕潤，而且入口依然好煙銀，軟殼蟹仲係熱㗎，十分之脆身，裏面嘅材料好豐富，蔬菜新鮮爽口，而且配上魚露食，更覺風味。明爐烏頭，好大條，而且好乾淨，魚鱗起得好清，魚肉紮實，最緊要係佢個湯底酸酸辣辣，滲入左去魚肉裏面，食落好開胃，而且配菜好多，裏面仲會有一啲菌類，而且個底仲有一啲粉絲，粉絲索晒個湯，感覺滋味。甜品方面，我哋叫咗椰汁西米糕，呢個甜品真係唔係周圍都可以食到，難得呢度可以俾我哋搵到，上面嘅椰汁好香好滑，下面嘅西米爽口彈牙，唔似整左好耐，總括嚟講呢間餐廳充滿泰國嘅風味，勝在食材好新鮮。