英記火鍋海鮮酒家 (已結業)

自從上一次响「辣蟹莊」同一班好耐冇見嘅朋友聚舊之後，有唔少人提議再約出嚟一齊飲飲食食。一講到食，我就緊係抱住一於奉陪到底嘅宗旨去「處理」啦。是次食聚嘅地點係友人提議嘅，貪其在區內有點兒歷史同埋有不錯嘅口碑。連前排上娛樂版頭條嘅陶大宇都有嚟，不過佢同埋一班圈外人食飯，唔見有「狐妮」出現，阿陶生當日都冇嚟精神，似乎好受緋聞所影響。「英記」內堂佈置簡陋，冇乜裝修，但店內就人頭湧湧，好不熱鬧。我地少少地四個人，拎住一張點菜紙，你一言、我一語，不費片刻，已經一致「裁定」以下食品必不可少，包括象拔蚌(兩食：蚌頭做魚生，蚌身做火鍋料)、鱔片、墨魚滑、肥牛、牛肩脊、鯇魚腩，當然就唔少得可以吸盡「精華」嘅烏冬啦。牛肉味道偏淡，甚至係友人提議嘅「牛肩脊」都唔係話特別滑。反而海鮮由於係游水嘅關係，食落都有鮮味，如果能夠用上海魚而非養魚，味道肯定更佳，不過價錢亦可以肯定唔止此數。價錢每人大約兩百蚊，雖然同大眾代嗰啲八十幾蚊任食有一段價格上嘅距離，但就可以食到一啲新鮮嘅食物，唔駛嗌嚟嗌去都係乜丸物丸咁悶，個人認為可以一試。