光榮冰室 (厚福街) (已結業)

今晚同男朋友嚟到光榮冰室，一心想食煲仔飯，我哋差唔多九點嚟到，一坐低侍應就話煲仔飯要等45分鐘，咁好彩等咗20分鐘煲仔飯就上咗啦。我哋叫咗窩蛋牛肉煲仔飯同埋臘味煲仔飯。我覺得臘味煲仔飯比較好食，臘腸潤腸都好夠味，窩蛋牛肉就比較普通。但最大最大最大問題係，啲飯好濕同埋好淋，應該係侍應太心急，反而食食吓可能煲仔嘅餘溫焗左啲飯拎去乾身啲，所以愈食就愈好味。但係我哋兩個人最尾都唔夠食，叫咗個炸髀，炸髀就一般啦，似係返炸再返炸，好濃，而且啲肉亦都好韌。