天台BBQ燒烤場 (已結業)

今次係我第二次幫襯View 8 Fire Club，上次喺大角咀店經已覺得無得彈，BBQ+卡拉OK+有鏢掟，簡直一次過滿足哂我3個願望！適逢中秋佳節，友人話官塘開咗分店，我地一眾〝好火之徒〞當然要去追月兼趁吓熱鬧啦！一眾14人由官塘站出發，5分鐘就到！呢度比大角咀店更大更舒適，仲有Locker可以租用，幾個朋友仔夾份租一個都係廿蚊，咁就玩得安樂放心啦！可能大時大節嘅關係，個場比較平日多人，不過呢d日子出得嚟玩就預咗啦，得小貓三四隻嘅話你仲驚！二話不說上去開餐！大虎蝦係我哋嘅不二之選，又大隻又彈牙！之前喺大圍食過，一樣咁嘅size要五六十蚊隻，呢度只係$28隻，好抵食！！豬頸肉同金莎骨都係我嘅至愛。豬頸肉燒到個面脆卜卜，咬落入面爽脆！金莎骨甜甜地夠哂入味，肉質軟滑，燒耐咗都唔會韌！呢度嘅食物醃得好入味，款式又夠多，唔似有d燒烤場求其落幾粒蒜蓉就當醃咗，淡而無味。尾聲必定留肚食嘅蒜蓉牛油法包，夠哂特色，輕輕一烘又香又脆，自從上次試過之後我就決定以後唔再燒方飽！醫飽個肚，再落番樓下嘆冷氣、唱歌仔、掟吓鏢，一個圓滿嘅追月夜！睇嚟下次再想輕輕鬆鬆咁BBQ，呢度都會係我地嘅首選！