夢工房西日料理 (已結業)

今日約咗係葵芳返工既朋友，佢推介去'夢工房西日料理'，話放題中佢食物多元化，好多食物選擇，我當然係樂於奉陪。我哋6:15去到，人未係好多,裝修好modern， 出面有四個裝汽水 、酒(任飲)嘅大雪櫃 ，仲有火鍋疏菜配料、醬油自己拎， 放題中都少見。嘩……見到點菜紙選擇都真係唔少喎， 我哋二話不說， 即刻點刺身、壽司先! 刺身我哋點咗三文魚腩，象拔蚌，甜蝦，壽司點了帶子、燒牛肉、虎蝦，整出品都好鮮甜。三文魚腩肥美，帶子壽司好新鮮，最值得再點!熟食方面，我首推黃金燒蠔，大大隻蠔，燒到很野味。另外天婦羅炸蠔及炸蝦，都很脆口。甜品方便，雪糕、雪條放滿2個大雪櫃，另外蛋糕都有好幾款選擇。 雪條我揀咗我至愛嘅榴槤味， 唔係周圍有得食，好正呀! 朋友揀咗椰子味，佢都話唔錯。 另外試咗個焦糖藍海鹽雪糕， 鹹鹹地味道好特別。餐廳實在太多選擇，食得太飽了，無試火鍋，下次一定要再嚟試埋火鍋。