老三火鍋雞煲海鮮放題

營業中

休息中

對上一次喺外面食火鍋已經係一年前，呢段時間買咗個蒸氣火鍋嘅架後，想打邊爐都係喺屋企，始終要洗嘢，每次食完都搞到好晏。前排朋友話呢間任食嘅火鍋店有我鐘意嘅白鱔片，而且價錢都幾抵，即刻重燃出去打邊爐嘅熱誠。餐廳都幾多卡座，另外有幾間房，中間係圓枱，我覺得坐得都算唔錯，落單後食物好快到，質素都幾好，另一點好滿意係所有職員都好有禮貌，比我感覺好好。先食雞煲，份量唔會太多，每人幾件，我哋呢個雖然走辣，但係都好惹味。之後點咗個清啲嘅芫荽皮蛋鍋，第一次見會落埋粟米蕃茄，菇類。每人會上一份鮑魚花膠海鮮盤，每份6款海鮮，鮑魚好新鮮喺隻碟度仲識得旭，亦有洗刷乾淨，蜆無沙，蝦都幾大隻，扇貝就普通。開始唔洗畫紙，職員會按人頭上一啲食物，食過好味再落單。白鱔片，龍躉肉係我最期待，鱔片雖然唔係好肥，不過都幾滑，唔鞋。龍躉肉都幾新鮮。安格斯牛肩胛，唔肥，又唔韌，不過牛味唔濃。手打蝦丸幾彈牙。呢度嘅鵝腸好味，雞子都幾大粒。仲有雪糕任食。飲品好多都啱我飲，除咗罐裝，仲有一渣渣嘅自家凉茶。