鳳城酒家 (干諾道西) (已結業)

疫情以來, 好耐無同 D 朋友聚舊, 難得呢晚朋友提議近住自己返工地方食飯, 當然第一時間應承, 朋友揀左上環呢間鳳城, 而且還一早就選好了 4人套餐, 套餐有 5菜 1點品 ! 首先要講係呢度既服務態度真係超好, 非常友善細心, 每上一個菜都會話個菜名你知, 而且最好就係差唔多食完一個菜, 佢地先上另一個, 咁就唔會凍哂, 到食完最後一個菜, 用過既碗碟都收好, 佢唔會即刻上埋個甜品, 佢會隔 5分鐘以上先埋來問下大家, 甜品可以上得未, 等大家食完有 D 時間休息一下 ! 食物方面, 以咁經濟既食物來講, 無任何既花巧, 賣既係煮功同埋味道, 自己覺得最好食係炸子雞, 雞皮好脆, 但依然保持到雞肉 juicy 好味而唔會又乾又, 而另一樣係鮑魚鵝掌, 鮑魚煮到岩岩好, 咬口非常好而且夠味, 鵝掌炆到岩岩好, 唔會太淋有口感又入味, 最後係甜品, 焗西米布甸, 唔會過甜, 夠熱, 所以要慢慢食,  而且呢份四人餐係絕對夠 4個大男人岩岩好, 如果細食 D 既就分分鐘要打包走 !